അരുത്.... ഇത് കുട്ടിക്കളിയല്ല....

 

ഇന്ത്യയിലെ ഏറ്റവും പരിഷ്കൃത സമൂഹമെന്ന് മേനി പറയുന്നവരാണ് ദൈവത്തിന്‍റെ സ്വന്തം നാട്ടിലെ മലയാളികള്‍. പക്ഷേ എന്തുപറ്റി ഇപ്പോള്‍ പ്രബുദ്ധരായ ഈ മലയാളികള്‍ക്ക്? കഴിഞ്ഞ കുറച്ചു കാലമായി മലയാളിയുടെ പ്രബുദ്ധത എല്ലാവരെയും ലജ്ജിപ്പിക്കുന്ന തരത്തിലേക്ക് താണുപോയോ? കാടടച്ചു വെടിവെയ്ക്കുകയല്ല കൂപന്‍. ഒരുകാര്യം മാത്രമേ പറയുന്നുള്ളൂ. ഒരു കൂട്ടരെ കുറിച്ച് മാത്രമേ പറയാനുള്ളൂ... കൊച്ചു കുട്ടികള്‍. കൊച്ചു കുട്ടികളോടുള്ള ക്രൂരതയുടെ കാര്യത്തില്‍ എല്ലാവരെയും ലജ്ജിപ്പിച്ച് മലയാളി ഒന്നാമതു തന്നെ. കേരളം പോലൊരു പരിഷ്കൃത സമൂഹത്തില്‍(തീര്‍ച്ചയായും അങ്ങനെ അവകാശപ്പെടരുത്) എന്തുകൊണ്ട് ഇങ്ങനെ സംഭവിക്കുന്നു. കുട്ടികളോട് ഇത്രയും ക്രൂരമായി പെരുമാറാന്‍ എങ്ങനെ മലയാളിക്ക് കഴിയുന്നു?

 

കാലിന്‍മേല്‍ കാല്‍ കയറ്റിയിരുന്നു സാമൂഹ്യവിമര്‍ശനം നടത്താന്‍ എന്തുയോഗ്യതയാണ് കേരള സമൂഹത്തിനും മലയാളിക്കുമുള്ളത്. ഉത്തരേന്ത്യയിലെ ഖാപ്പ് പഞ്ചായത്തുകളെയും ബീഹാറിലെ കാട്ടു നീതിയെയുമെല്ലാം ലജ്ജിപ്പിക്കുന്ന ക്രൂരതകളല്ലേ കേരളസമൂഹത്തില്‍ അരങ്ങേറുന്നത്. ഇതെല്ലാം എങ്ങനെ കണ്ടില്ലെന്ന് നടിക്കുന്നു മലയാളികള്‍....

 

 

ഒരുപാടു കാലം പിറകിലേക്ക് പോകേണ്ടതില്ല. മാധ്യമങ്ങള്‍ കൊണ്ടാടിയ കുമളിയിലെ ഷെഫീഖിന്‍റെ ദുരിതം നമ്മുടെ മനസില്‍ ഇപ്പോഴുമുണ്ട്. ഇതിനു ശേഷം എത്രയോ ഷെഫീഖുമാര്‍ ഈ ചുരുങ്ങിയ കാലയളില്‍ ഉണ്ടായിരിക്കുന്നു. തിരുവനന്തപുരത്ത് പിതൃസഹോദരന്‍ കഴുത്തറത്തു കൊന്നതും ജീവിതം എന്തെന്ന് അറിയാത്ത രണ്ടു പിഞ്ചു കുഞ്ഞുങ്ങളെ.... കുമളിയില്‍ അമ്മ കഴുത്തറത്തു കൊന്നത് മണിക്കൂറുകള്‍ മാത്രം പ്രായമുള്ള ഇരട്ടകുട്ടികളെ, ഈ പട്ടിക നീളുന്നു. ഏറ്റവുമൊടുവില്‍ അമ്മയുടെ കാമുകന്‍റെ മര്‍ദനത്തില്‍ കൊല്ലപ്പെട്ട്, അമ്മയുടെ അറിവോടെ കുഴിച്ചു മൂടപ്പെട്ട അക്സ എന്ന നാലു വയസുകാരി വരെ. ഇതിനൊപ്പം ബന്ധുക്കളുടെ ക്രൂരപീഡനത്തിനിരയാകുന്ന കുട്ടികളുടെ എണ്ണം വേറെ.... കഴിഞ്ഞ മുപ്പതു ദിവസത്തിനിടെ പുറം ലോകമറിഞ്ഞ ഇത്തരം സംഭവങ്ങള്‍ മാത്രം മുപ്പതോളം വരും... അറിയാതെ പോകുന്ന ദുരിതങ്ങള്‍ അതിലേറെ...

 

ദിനം പ്രതിയെന്നോണം കൊച്ചു കുട്ടികള്‍ ലൈംഗികമായി പീഡിപ്പക്കപ്പെടുന്നതും ദൈവത്തിന്‍റെ (അതോ ചെകുത്താന്‍റെയോ) സ്വന്തം നാട്ടില്‍ തന്നെ.... അമ്മയുടെ കാമുകന്‍റെയും ജാരന്‍റെയും പീഡനത്തിന് ഇരയായ പെണ്‍കുഞ്ഞുങ്ങളുടെ കഥകള്‍ മലയാളികളെ അക്ഷരാര്‍ഥത്തില്‍ ഞെട്ടിച്ചു. പലപ്പോഴും സ്വന്തം അമ്മയുടെ അറിവോടെയാണ് ഇത്തരം പീഡനങ്ങളെന്ന വാസ്തവം ഒരു മുള്ളുപോലെ മലയാളി മനസാക്ഷിയെ കൊത്തി വലിയ്ക്കുന്നു. നാലു വയസുള്ള മകളുടെ തലയ്ക്ക് ഉലക്ക കൊണ്ട് അടിച്ച പിതാവും ഈ കേരളത്തില്‍ ജീവിക്കുന്നുണ്ട്.

 

എങ്ങനെ കഴിയുന്നു നമുക്ക് ഇത്ര ക്രൂരമൃഗങ്ങളായി മാറാന്‍. ഒരു നിമിഷം ആ പിഞ്ചു കണ്ണുകളിലേക്ക് നോക്കൂ... അവരുടെ കൊച്ചു തെറ്റുകള്‍ നമുക്ക് പൊറുക്കാം. ഇത്തരം തെറ്റുകള്‍ ചെയ്തും അത് തിരുത്തപ്പെട്ടുമാണ് നമ്മളും ഈ സമൂഹവുമുണ്ടാകുന്നത്. ഒരു തലമുറയ്ക്കെതിരെയുള്ള ഈ അതിക്രമങ്ങള്‍ നമുക്ക് അവസാനിപ്പിക്കാം. ഇത് ഇനി ആവര്‍ത്തിച്ചു കൂടാ.... ഇത്തരം തലക്കെട്ടുകളില്‍ ഇനി മാധ്യമങ്ങളില്‍ വരാതിരിക്കട്ടെ..... കേരളമേ ഈ കളി... കുട്ടിക്കളിയല്ല.... ഇത് തീക്കളിയാണ്.